ദോഹ: ഈദ് അൽ അദ്ഹ അവധിക്കാലവും ഹജ്ജ് സീസണും പ്രമാണിച്ച് യാത്രക്കാരുടെ വൻ തിരക്ക് കണക്കിലെടുത്ത് ഹമദ് അന്താരാഷ്ട്ര വിമാനത്താവളത്തിൽ പുതിയ അറൈവൽ മാർഗനിർദ്ദേശങ്ങൾ പുറപ്പെടുവിച്ചു. എമിഗ്രേഷൻ നടപടികൾ, ബാഗേജ് കളക്ഷൻ, ഗ്രൗണ്ട് ട്രാൻസ്പോർട്ട്, പാസഞ്ചർ പിക്ക്-അപ്പ് എന്നിവ സുഗമമാക്കാനാണ് വിമാനത്താവള അതോറിറ്റി പുതിയ നിയന്ത്രണങ്ങളും നിർദ്ദേശങ്ങളും ഏർപ്പെടുത്തിയിരിക്കുന്നത്. അവധി കഴിഞ്ഞ് ഇന്ത്യയിൽ നിന്ന് മടങ്ങിയെത്തുന്ന പ്രവാസി കുടുംബങ്ങൾക്കും ഹജ്ജ് തീർത്ഥാടകരെ സ്വീകരിക്കാൻ എത്തുന്നവർക്കും ഈ വിവരങ്ങൾ ഏറെ സഹായകരമാകും.
എമിഗ്രേഷൻ നടപടികൾ വേഗത്തിലാക്കാൻ അർഹരായ യാത്രക്കാർക്ക് അറൈവൽ ഹാളിലെ ‘സ്കാൻ ആൻഡ് ഗോ’ (Scan & Go) ഇ-ഗേറ്റുകൾ ഉപയോഗിക്കാവുന്നതാണ്. കുറഞ്ഞത് 130 സെന്റിമീറ്റർ ഉയരമുള്ള യാത്രക്കാർക്കാണ് ഈ ഡിജിറ്റൽ സേവനം ലഭ്യമാകുക. വലിയ വലിപ്പത്തിലുള്ള ലഗേജുകൾ, വീൽചെയറുകൾ, ബേബി സ്ട്രോളറുകൾ എന്നിവ പ്രത്യേകം സജ്ജീകരിച്ചിരിക്കുന്ന എ, ബി ബാഗേജ് ബെൽറ്റുകൾ വഴിയാണ് വിതരണം ചെയ്യുകയെന്ന് വിമാനത്താവള അധികൃതർ അറിയിച്ചു.
ഹജ്ജ് കഴിഞ്ഞ് മടങ്ങുന്ന തീർത്ഥാടകർ കൊണ്ടുവരുന്ന വിശുദ്ധ സിംസിം വെള്ളം (Zamzam Water) ശേഖരിക്കുന്നതിനായി പ്രത്യേക ബാഗേജ് ബെൽറ്റുകൾ ക്രമീകരിച്ചിട്ടുണ്ട്. യാത്രക്കാരുടെ സഹായത്തിനായി ഇവിടെ ജീവനക്കാരുടെ സേവനവും ലഭ്യമായിരിക്കും. പൊട്ടിപ്പോകാൻ സാധ്യതയുള്ള വസ്തുക്കൾ ഹാർഡ്-ഷെൽ ബാഗുകളിൽ മാത്രം സൂക്ഷിക്കുക, വീട്ടിൽ എത്തുന്നതുവരെ ബാഗേജ് ടാഗുകൾ കളയാതെ സൂക്ഷിക്കുക, ലഗേജ് കൈപ്പറ്റുന്നതിന് മുൻപ് സ്വന്തം ബാഗ് തന്നെയെന്ന് ഉറപ്പുവരുത്തുക തുടങ്ങിയ നിർദ്ദേശങ്ങളും അതോറിറ്റി മുന്നോട്ടുവെക്കുന്നു.
യാത്രക്കാരെ സ്വീകരിക്കാൻ വിമാനത്താവളത്തിൽ എത്തുന്നവർ തിരക്കേറിയ സമയങ്ങളിൽ നിർബന്ധമായും പാർക്കിങ് സൗകര്യങ്ങൾ ഉപയോഗിക്കേണ്ടതാണ്. ടെർമിനലിന് മുന്നിൽ ഡ്രൈവർമാരില്ലാതെ വാഹനങ്ങൾ പാർക്ക് ചെയ്യുന്നത് കടുത്ത ഗതാഗതക്കുരുക്കിന് കാരണമാകുമെന്നതിനാൽ ഇത്തരം വാഹനങ്ങൾ ഉടൻ തന്നെ ക്രെയിൻ ഉപയോഗിച്ച് നീക്കം ചെയ്യും. വിമാനത്താവളത്തിൽ നിന്ന് പുറപ്പെടുന്നവർക്ക് മെട്രോ സേവനങ്ങൾക്ക് പുറമെ ടാക്സികൾ, ബസ് പവിലിയനുകൾ, ഊബർ, ബദ്ർഗോ, റൈഡ് തുടങ്ങിയ റൈഡ് ഷെയറിങ് ആപ്പുകളുടെ പ്രത്യേക പിക്ക്-അപ്പ് കേന്ദ്രങ്ങൾ എന്നിവയും ഉപയോഗപ്പെടുത്താം.








