തിരുവനന്തപുരം: മുഖ്യമന്ത്രി വി.ഡി. സതീശന്റെ നേതൃത്വത്തിൽ അധികാരമേറ്റ പുതിയ യുഡിഎഫ് സർക്കാരിന്റെ ആദ്യ നയപ്രഖ്യാപന പ്രസംഗം നിയമസഭയിൽ ആരംഭിച്ചു. ഗവർണർ ആരിഫ് മുഹമ്മദ് ഖാൻ സഭയിൽ നടത്തുന്ന നയപ്രഖ്യാപനത്തോടെയാണ് ഈ സർക്കാരിന്റെ ആദ്യ പൂർണ്ണ ബജറ്റ് സമ്മേളനത്തിന് തുടക്കമാകുന്നത്. രാവിലെയോടെ സഭയിലെത്തിയ ഗവർണറെ മുഖ്യമന്ത്രി വി.ഡി. സതീശൻ, പാർലമെന്ററി കാര്യമന്ത്രി സണ്ണി ജോസഫ്, സ്പീക്കർ തിരുവഞ്ചൂർ രാധാകൃഷ്ണൻ എന്നിവർ ചേർന്ന് ഔദ്യോഗികമായി സ്വീകരിച്ചു. പ്രവാസി മലയാളി സമൂഹവും കേരള ജനതയും ഏറെ ആകാംഷയോടെയാണ് പുതിയ സർക്കാരിന്റെ ഈ വികസനരേഖയെ നോക്കിക്കാണുന്നത്.
യുഡിഎഫ് സർക്കാരിന്റെ ആദ്യ മന്ത്രിസഭാ യോഗത്തിൽ പ്രഖ്യാപിച്ച കെഎസ്ആർടിസി ബസുകളിൽ സ്ത്രീകൾക്കുള്ള സൗജന്യ യാത്ര ജൂൺ 15 മുതൽ നടപ്പിലാക്കുന്നത് ഉൾപ്പെടെയുള്ള സുപ്രധാന ജനക്ഷേമ പദ്ധതികളുടെ വിശദാംശങ്ങൾ നയപ്രഖ്യാപനത്തിൽ ഇടംപിടിക്കും. സാമ്പത്തിക പ്രതിസന്ധി മറികടക്കാനുള്ള പുതിയ പദ്ധതികൾ, നാഷണൽ ഹൈവേ വികസനം വേഗത്തിലാക്കൽ, വിഴിഞ്ഞം അന്താരാഷ്ട്ര തുറമുഖ പദ്ധതിയുടെ അടുത്ത ഘട്ട പ്രവർത്തനങ്ങൾ എന്നിവയ്ക്കുള്ള വ്യക്തമായ മാർഗ്ഗരേഖയും ഗവർണറുടെ പ്രസംഗത്തിൽ ഉണ്ടാകും. വിവരസാങ്കേതിക മേഖലയ്ക്ക് കൂടുതൽ കരുത്ത് പകരാൻ ഐടി വകുപ്പ് ഇനി മുതൽ ‘ഐടി ഫ്യൂച്ചർ ടെക്നോളജി ആൻഡ് സ്റ്റാർട്ടപ്പ്’ എന്ന പേരിൽ പുനഃക്രമീകരിക്കുന്നതിനെക്കുറിച്ചുള്ള പ്രഖ്യാപനവും ഇതിലുണ്ട്.
ഭരണമാറ്റത്തിന് ശേഷം പുതിയ വികസന കാഴ്ചപ്പാടുകളോടെ മുന്നോട്ട് പോകുന്ന കേരളത്തിന്റെ ഭാവിയും പ്രവാസികളുടെ പുനരധിവാസവും ലക്ഷ്യമിട്ടുള്ള വിവിധ പദ്ധതികളുടെ സൂചനകൾ നയപ്രഖ്യാപനത്തിൽ പ്രതിഫലിക്കുന്നുണ്ട്. വയോജനങ്ങൾക്കായി പ്രത്യേക വകുപ്പ് രൂപീകരിക്കുന്നതുമായി ബന്ധപ്പെട്ട ചട്ടക്കൂടുകളും ഇതിലൂടെ വ്യക്തമാകും. ജൂൺ 5-ന് അവതരിപ്പിക്കാനിരിക്കുന്ന പുതിയ സർക്കാരിന്റെ പ്രഥമ ബജറ്റിന്റെ ദിശാസൂചന കൂടിയാണ് സഭയിൽ നടക്കുന്ന ഈ നയപ്രഖ്യാപനം.









