ദോഹ: ഖത്തറിൽ ഗർഭിണികളും നവജാതശിശുക്കളും ശ്രദ്ധിക്കേണ്ട ആരോഗ്യ ജാഗ്രതാ നിർദ്ദേശവുമായി പൊതുജനാരോഗ്യ മന്ത്രാലയം (MoPH). കുട്ടികളിൽ കടുത്ത ശ്വാസകോശ അണുബാധയ്ക്ക് കാരണമാകുന്ന ‘റെസ്പിറേറ്ററി സിൻസിറ്റിയൽ വൈറസ്’ (RSV) ബാധയെ സാധാരണ ജലദോഷമായി കണ്ട് തള്ളിക്കളയരുതെന്ന് അധികൃതർ മുന്നറിയിപ്പ് നൽകി. ചുമയോ പനിയോ ആയി തുടങ്ങുന്ന ഈ രോഗബാധ കുഞ്ഞുങ്ങളിൽ ന്യൂമോണിയ പോലുള്ള ഗുരുതരമായ അവസ്ഥകളിലേക്ക് വഴിമാറാൻ സാധ്യതയുണ്ട്. അതിനാൽ ഗർഭകാലത്ത് സ്വീകരിക്കുന്ന വാക്സിനേഷൻ കുഞ്ഞുങ്ങൾക്ക് ആദ്യ മാസങ്ങളിൽ നിർണായക സംരക്ഷണം നൽകുമെന്നും മന്ത്രാലയം ഓർമ്മിപ്പിച്ചു.
ഗർഭാവസ്ഥയുടെ 28 മുതൽ 36 ആഴ്ചകൾക്കിടയിലാണ് സ്ത്രീകൾ ഈ വാക്സിൻ സ്വീകരിക്കേണ്ടത്. ഇത് വഴി അമ്മയിൽ നിന്നുണ്ടാകുന്ന സംരക്ഷക ആന്റിബോഡികൾ നവജാതശിശുവിലേക്ക് കൈമാറ്റം ചെയ്യപ്പെടും. രോഗപ്രതിരോധ ശേഷി കുറഞ്ഞ കുഞ്ഞുങ്ങളുടെ ആദ്യ മാസങ്ങളിൽ ശ്വസനരോഗങ്ങൾ വേഗത്തിൽ ഗുരുതരമാകാൻ സാധ്യതയുള്ളതിനാൽ ഈ വാക്സിനേഷൻ ഏറെ ഫലപ്രദമാണ്. ഖത്തറിലെ പ്രൈമറി ഹെൽത്ത് കെയർ കോർപ്പറേഷൻ (PHCC) കേന്ദ്രങ്ങളിലും ഹമദ് മെഡിക്കൽ കോർപ്പറേഷൻ (HMC) ആശുപത്രികളിലും ഈ വാക്സിൻ പൂർണ്ണമായും സൗജന്യമായി ലഭ്യമാണ്. ഖത്തറിലെ ഇന്ത്യൻ പ്രവാസി കുടുംബങ്ങൾ ഉൾപ്പെടെയുള്ളവർക്ക് ഈ സേവനം പ്രയോജനപ്പെടുത്താം.
തുമ്മൽ, ചുമ, മലിനമായ പ്രതലങ്ങൾ എന്നിവയിലൂടെ വേഗത്തിൽ പകരുന്ന വൈറസാണ് RSV. അതിനാൽ വാക്സിൻ സ്വീകരിക്കുന്നതിനൊപ്പം തന്നെ കൃത്യമായ കൈ ശുചിത്വം പാലിക്കുക, തിരക്കേറിയ ഇടങ്ങളിൽ ജാഗ്രത പുലർത്തുക എന്നിവയും പ്രധാനമാണ്. കുഞ്ഞുങ്ങളിൽ എന്തെങ്കിലും തരത്തിലുള്ള രോഗലക്ഷണങ്ങൾ കണ്ടാൽ ഒട്ടും വൈകാതെ തന്നെ വൈദ്യസഹായം തേടണമെന്നും ആരോഗ്യ മന്ത്രാലയം നിർദ്ദേശിച്ചു. കൂടുതൽ വിവരങ്ങൾക്കും വാക്സിനേഷൻ സമയക്രമത്തിനുമായി കുടുംബ ഡോക്ടറെയോ അടുത്തുള്ള പി.എച്ച്.സി.സി ഹെൽത്ത് സെന്ററിനെയോ സമീപിക്കാവുന്നതാണ്.






