ദോഹ: അവധി യാത്രകൾ കൂടുന്ന പശ്ചാത്തലത്തിൽ അബു സമ്ര ലാൻഡ് ബോർഡർ ഉപയോഗിക്കുന്നവർ മെത്രാഷ് ആപ്പിൽ മുൻകൂർ രജിസ്റ്റർ ചെയ്യണമെന്ന് ഖത്തർ ആഭ്യന്തരമന്ത്രാലയം ഓർമ്മപ്പെടുത്തി. റോഡ് മാർഗം യാത്ര ചെയ്യുന്ന ഇന്ത്യൻ കുടുംബങ്ങൾക്കും ഡ്രൈവർമാർക്കും ഇത് ക്യൂ സമയം കുറയ്ക്കാൻ സഹായിക്കും.
ഈദ് അവധിയും വേനൽ യാത്രകളും മുന്നിൽ കണ്ടുകൊണ്ടാണ് ഈ ഓർമ്മപ്പെടുത്തൽ. മെത്രാഷ് മൊബൈൽ ആപ്പിലെ ഈ സൗകര്യം ഉപയോഗിച്ച് ഖത്തറിലെ പൗരന്മാരും റെസിഡന്റുകളും യാത്രാ നടപടികൾ മുമ്പേ പൂർത്തിയാക്കിയാൽ അതിർത്തി കൂടുതൽ സൗകര്യപ്രദമായി കടക്കാമെന്ന് മന്ത്രാലയം അറിയിച്ചു.
നടപടിക്രമം ലളിതമാണ്. മെത്രാഷ് ആപ്പിൽ ലോഗിൻ ചെയ്ത് ‘Travel’ വിഭാഗത്തിലേക്ക് പോകണം. അതിൽ ‘Pre-Registration for Abu Samra’ തിരഞ്ഞെടുക്കുകയും Entry ആണോ Exit ആണോ എന്ന് തീരുമാനിക്കുകയും പ്രതീക്ഷിക്കുന്ന യാത്ര/എത്തിച്ചേരൽ തീയതി നൽകുകയും വേണം. ശേഷം ഉപയോഗിക്കുന്ന വാഹനത്തിന്റെ തരം തിരഞ്ഞെടുക്കണം. യാത്രക്കാരെയും ഡ്രൈവർമാരെയും citizen/resident അല്ലെങ്കിൽ visitor വിഭാഗങ്ങളിലായി ചേർക്കാം. വിവരങ്ങൾ പരിശോധിച്ച് സമർപ്പിച്ചാൽ രജിസ്ട്രേഷൻ പൂർത്തിയായതായി സന്ദേശം ലഭിക്കും.
വാഹന ഉടമ യാത്ര ചെയ്യാത്ത സാഹചര്യത്തിൽ GCC രാജ്യങ്ങളിൽ നിന്നുള്ള ഡ്രൈവർമാരെയും യാത്രക്കാരെയും ഐഡി അല്ലെങ്കിൽ പാസ്പോർട്ട് നമ്പർ ഉപയോഗിച്ച് ചേർക്കാം; സന്ദർശകരെ പാസ്പോർട്ട് നമ്പർ വഴി ഉൾപ്പെടുത്താനും സാധിക്കും. സൗദിയിലേക്കുള്ള റോഡ് യാത്രകൾ കൂടുതലാകുന്ന ദിനങ്ങളിൽ കാത്തിരിപ്പ് കുറയ്ക്കാനും രേഖാപരമായ തിരക്ക് ഒഴിവാക്കാനും ഈ സൗകര്യം ഉപകാരപ്പെടും.






