ദോഹ: ഖത്തറിലെ സ്വകാര്യ വിദ്യാഭ്യാസ, പരിശീലന മേഖലകളിൽ സുതാര്യതയും പ്രവേശനക്ഷമതയും വർദ്ധിപ്പിക്കുന്നതിനായി വിദ്യാഭ്യാസം, ഉന്നത വിദ്യാഭ്യാസം മന്ത്രാലയം പുതിയ ഡിജിറ്റൽ ഭൂപടം (ഡിജിറ്റൽ മാപ്പ്) പുറത്തിറക്കി. രാജ്യത്തുടനീളം പ്രവർത്തിക്കുന്ന ലൈസൻസുള്ള സ്വകാര്യ വിദ്യാഭ്യാസ, പരിശീലന കേന്ദ്രങ്ങളെ പൊതുജനങ്ങൾക്ക് എളുപ്പത്തിൽ കണ്ടെത്താൻ സഹായിക്കുന്നതാണ് ഈ പ്ലാറ്റ്ഫോം. നിലവിൽ 182 കേന്ദ്രങ്ങൾ ഈ മാപ്പിൽ ഉൾപ്പെടുത്തിയിട്ടുണ്ട്. മന്ത്രാലയത്തിന്റെ വെബ്സൈറ്റ് വഴി ഈ സേവനം പൊതുജനങ്ങൾക്ക് ലഭ്യമാണ്.
ഭൂപടത്തിൽ ഉൾപ്പെടുത്തിയിരിക്കുന്ന കേന്ദ്രങ്ങളെ ഭൂമിശാസ്ത്രപരമായ സ്ഥാനം, നൽകുന്ന കോഴ്സുകളുടെ തരം എന്നിവയുടെ അടിസ്ഥാനത്തിൽ തരംതിരിച്ചിട്ടുണ്ട്. ഓരോ കേന്ദ്രത്തെക്കുറിച്ചുമുള്ള വിശദമായ വിവരങ്ങളും ഇതിൽ ലഭ്യമാകും. വിദ്യാർത്ഥികൾ, രക്ഷിതാക്കൾ, പരിശീലനം ആഗ്രഹിക്കുന്നവർ എന്നിവർക്ക് അവരുടെ ആവശ്യങ്ങൾക്ക് അനുയോജ്യമായ കേന്ദ്രങ്ങൾ ഏറ്റവും അടുത്തുള്ള സ്ഥലങ്ങളിൽ കണ്ടെത്താനും തിരഞ്ഞെടുക്കാനും ഇത് സഹായകമാകും. വരും ദിവസങ്ങളിൽ കൂടുതൽ ലൈസൻസുള്ള കേന്ദ്രങ്ങളെ ഭൂപടത്തിൽ ഉൾപ്പെടുത്താനും വിവരങ്ങൾ പുതുക്കാനും പദ്ധതിയുണ്ട്.
വിദ്യാഭ്യാസ മേഖലയിലെ നവീകരണത്തിനും ഡിജിറ്റൽ പരിവർത്തനത്തിനും മന്ത്രാലയം നൽകുന്ന പ്രാധാന്യത്തിന്റെ ഭാഗമാണ് ഈ പുതിയ പ്ലാറ്റ്ഫോം. ലൈസൻസുള്ള കേന്ദ്രങ്ങളെക്കുറിച്ച് വിശ്വസനീയമായ വിവരങ്ങൾ ലഭ്യമാക്കുന്നത് അനധികൃത സ്ഥാപനങ്ങൾ തടയാൻ സഹായിക്കുമെന്ന് മന്ത്രാലയം വ്യക്തമാക്കി. കൂടുതൽ വിവരങ്ങൾക്കും ഡിജിറ്റൽ മാപ്പ് പരിശോധിക്കാനും മന്ത്രാലയത്തിന്റെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്.








