ഖത്തറിലെ സർക്കാർ ജീവനക്കാരുടെ സേവനാനന്തര ആനുകൂല്യങ്ങൾ (End of Service Gratuity) കണക്കാക്കുന്നതിനുള്ള നടപടികൾ പൂർണ്ണമായും ഡിജിറ്റലൈസ് ചെയ്തു. സിവിൽ സർവീസ് ആൻഡ് ഗവൺമെൻ്റ് ഡെവലപ്മെൻ്റ് ബ്യൂറോ (CGB) ആണ് ഔദ്യോഗിക ഭരണനിർവഹണ സംവിധാനമായ ‘മവാരിദ്’ (Mawared) സിസ്റ്റത്തിൽ ഈ പുതിയ ഓട്ടോമേഷൻ സംവിധാനം അവതരിപ്പിച്ചത്. ആഭ്യന്തര പ്രവർത്തനങ്ങളുടെ കാര്യക്ഷമത വർദ്ധിപ്പിക്കുന്നതിനും പ്രവാസികൾ ഉൾപ്പെടെയുള്ള ജീവനക്കാർക്ക് ഡിജിറ്റൽ സേവനങ്ങൾ കൂടുതൽ സുഗമമാക്കുന്നതിനും വേണ്ടിയാണ് ഈ പരിഷ്കാരമെന്ന് സി.ജി.ബി വ്യക്തമാക്കുന്നു.
പുതിയ പരിഷ്കാരത്തിലൂടെ മുൻപത്തെ അപേക്ഷിച്ച് തൊഴിൽ സമയത്തിൻ്റെ 90 ശതമാനത്തോളം ലാഭിക്കാൻ സാധിക്കുമെന്നാണ് അധികൃതർ വ്യക്തമാക്കുന്നത്. സിസ്റ്റത്തിൽ രേഖപ്പെടുത്തിയിട്ടുള്ള ജീവനക്കാരുടെ വിവരങ്ങൾ അടിസ്ഥാനമാക്കി വെറും 5 സെക്കൻഡുകൾക്കുള്ളിൽ തന്നെ ഗ്രാറ്റുവിറ്റി റിപ്പോർട്ട് പൂർണ്ണമായി തയ്യാറാക്കാൻ ഈ ഓട്ടോമേഷൻ സംവിധാനത്തിന് കഴിയും. സിവിൽ ഹ്യൂമൻ റിസോഴ്സ് നിയമത്തിലെയും അതിൻ്റെ എക്സിക്യൂട്ടീവ് റെഗുലേഷനുകളിലെയും വ്യവസ്ഥകൾ പൂർണ്ണമായും പാലിച്ചാണ് ഇത് സജ്ജമാക്കിയിരിക്കുന്നത്.
ഗ്രാറ്റുവിറ്റി കണക്കുകൂട്ടലുകളിൽ മനുഷ്യസഹജമായ ഇടപെടലുകൾ ഒഴിവാക്കുന്നത് വഴി കണക്കുകളിലെ പിഴവുകൾ പൂർണ്ണമായും ഇല്ലാതാക്കാനും കൃത്യത ഉറപ്പാക്കാനും സാധിക്കും. സർവീസ് കാലയളവ്, ആനുകൂല്യങ്ങൾ ലഭ്യമാകുന്ന ഘടകങ്ങൾ എന്നിവയുടെ സമഗ്രമായ വിവരങ്ങൾ അടങ്ങിയ റിപ്പോർട്ട് വളരെ വേഗത്തിൽ ഉദ്യോഗസ്ഥർക്ക് പരിശോധിക്കാനും ഇതിലൂടെ സാധിക്കുമെന്ന് സി.ജി.ബി എക്സ് (X) പ്ലാറ്റ്ഫോമിലൂടെ അറിയിച്ചു.







